Grazas, voluntariado da biblioteca!

Queremos agradecer ao alumnado voluntario da biblioteca o seu compromiso, ilusión e colaboración ao longo do curso 2025-2026.

Este vídeo é unha pequena homenaxe ao voso traballo. Grazas por facer da nosa biblioteca un lugar mellor! 

Recomendacións literarias para o verán

Dende a biblioteca do CEP Altamira queremos compartir convosco unha selección de recomendacións literarias para este verán. Libros para descubrir novas historias, viaxar coa imaxinación e desfrutar da lectura durante as vacacións.

                

Feliz verán e boas lecturas!

Un curso de película... no espazo!

Ao longo deste curso viaxamos polo universo a través do noso proxecto anual, descubrindo, aprendendo e desfrutando de innumerables experiencias.

Neste vídeo recollemos unha pequena mostra de todo o vivido. Agardamos que vos guste tanto como a nós nos gustou emprender esta gran aventura espacial.

Última sesión do Club de Lectura de 6º de Primaria

Esta semana celebramos na biblioteca a última sesión do Club de Lectura co alumnado de 6º de Primaria, que en breve comezará unha nova estapa no instituto.

Nesta ocasión compartimos impresións sobre a lectura No corazón do bosque de Agustín Fernández Paz, unha obra que nos levou a reflexionar sobre a amizade, o misterio e a natureza.

Despedimos así un grupo de grandes lectoras e lectores aos que lles desexamos moita sorte no seu novo camiño. Agardamos que continúen gozando dos libros e da lectura alá onde vaian.

Visita de Eva Mejuto á nosa biblioteca

A nosa biblioteca tivo a sorte de recibir a visita da marabillosa Eva Mejuto.

O alumnado de 4ºC e 4ºD leu Keko e Kika, mentres que o alumnado de 6ºA e 6ºD gozou de O día que choveron gatos. Tras a lectura, puideron coñecer de preto á autora, descubrir curiosidades sobre as súas obras e compartir con ela as súas impresións e preguntas.

Moitas grazas, Eva, pola túa visita. Foi un auténtico pracer contar contigo na nosa biblioteca.

Animación á lectura en 3º de Primaria

O alumnado de 3º de Primaria desfrutou dunha sesión de animación á lectura grazas ao agasallo do Consorcio. Moitas grazas!

Letras Galegas 2026

Na nosa biblioteca escolar celebramos as Letras Galegas 2026, adicadas este ano a Begoña Caamaño, cun festival no auditorio cheo de música e emoción.

Neste vídeo podedes ver algúns momentos da celebración e tamén o mural realizado polas voluntarias da biblioteca.

Agardamos que vos guste!

Visita de Anxo Fariña

Anxo Fariña é un ilustrador, escritor e deseñador de libros infantís e xuvenís galego. O alumnado de 5º C  e de 5º D tivo a sorte de poder ler un dos seus libros e de velo en directo na nosa biblioteca.

 Moitas grazas, Anxo!

Gañadores e gañadoras do Día do Libro

Os gañadores e gañadoras do eslogan feito o Día do Libro para fomentar a lectura podédelos ver nestas fotos.

Parabéns!

Torneo de xadrez

Na biblioteca do CEP Altamira tivo lugar o primeiro torneo de xadrez. Foi unha actividade moi especial na que o alumnado puido poñer en práctica a súa concentración, estratexia e compañeirismo arredor do taboleiro.

A experiencia resultou moi positiva e contou cunha gran participación, convertendo á biblioteca nun espazo de encontro e aprendizaxe tamén a través do xogo. Sen dúbida, unha iniciativa para repetir!

DÍA DO LIBRO

No CEP Altamira celebramos o Día do Libro ao grande. O alumnado de 6º apadriñou ao de 1º, o de 5º ao de 3º e o de 4º ao de 2º. 

Primeiramente leron un poema no que o protagonista era un libro e despois outro relacionado coa temática deste curso "o espazo". Posteriormente chegou a parte máis creativa da actividade, na que cada parella inventou un slogan para fomentar a lectura.

Iago López

 Hoxe o alumnado do primeiro nivel tivo o pracer de desfrutar dun ratiño co marabilloso Iago López.

Día do libro

Hoxe, 23 de abril, celebramos o Día do Libro. Na nosa biblioteca, durante o recreo, tivo lugar un obradoiro de libros de papiroflexia coa mestra Vivi. Ao rematar a actividade, agasallábanllos adicados a todas aquelas persoas que visitaron a biblioteca.

Aquí tedes un pequeno vídeo resumo da actividade.  "Un neno que le será un adulto que pensa"

Apadriñamento no CRA Raíña Aragonta

O voluntariado de 5º e 6º acudiu ao CRA Raíña Aragonta, onde leron, debuxaron e colorearon cos máis pequenos. Pasárono xenial!

Aquí vos deixamos un vídeo para que poidades ver algúns dos momentos desta visita.

Gañadoras do Día da Poesía

Na biblioteca escolar celebramos o Día da Poesía cun recital no que o alumnado compartiu fermosos poemas cheos de creatividade e emoción.

Parabéns ás gañadoras desta edición polo seu gran traballo e tamén a todas as persoas participantes por facer desta actividade un momento tan especial.

Día da poesía, 21 de marzo

O alumnado do CEP Altamira comparte as súas poesías nun recital cheo de creatividade e expresión.

Non volo perdades! 

 

Visita especial en primeiro nivel: Sabela Gago

O alumnado de 1º nivel recibiu a visita de Sabela Gago, foi un encontro moi ameno e participativo. 

Semana da prensa

 Semana da prensa no CEP Altamira e como non, na nosa biblioteca.

Obra de teatro na nosa biblioteca: Mamá Robot

Na nosa biblioteca tivemos o pracer de ver a obra "Mamá Robot", unha representación que pon en valor o traballo incansable das nais: coidar da casa, facer os deberes cos fillos/as... Elas sempre dispoñibles para axudar.

A obra foi interpretada polas voluntarias de sexto da biblioteca, deixámosvos o vídeo para que poidades desfrutar desta magnífica actuación.

Erea Mora na nosa biblioteca

O luns 9 de marzo visitou ao alumnado do segundo nivel Erea Mora.

                                                                Equipo de Biblioteca

Club de lectura de 5º na biblioteca

O alumnado de 5º reuniuse na biblioteca do centro para desfrutar dunha nova sesión do noso club de lectura. Nesta ocasión leron "La historia de Julian" de R.J. Palacioz, un libro que invita a reflexionar sobre a amizade, a empatía e a importancia de aceptar ás demais persoas.

Mamá Robot

Hoxe as nosas voluntarias de sexto interpretron  a obra "Mamá Robot" no CRA Raíña Aragonta. Unha representación que pon en valor o traballo incansable das nais.

8M na biblioteca: creatividade e reflexión

Con motivo do Día Internacional da Muller, dende o centro leváronse a cabo diversas actividades para fomentar a reflexión e a creatividade en torno á igualdade.

Neste vídeo podedes ver o mural realizado a partir dunha imaxe dun cómic de Xosé Tomás, que serviu como punto de partida para traballar o papel da muller e dar visibilidade ás súas historias.

Ademais, durante o recreo elaboráronse debuxos de mulleres entre outras actividades que tiveron lugar na aula de audiovisuais.

Xincana sobre Rosalía de Castro

Na biblioteca celebramos unha divertida xincana sobre Rosalía de Castro. Foi un escape room no que participou o alumnado do centro, cada clase por quendas.

Ao longo da actividade tiveron que superar diferentes probas, resolver pistas e aprender máis sobre a vida e a obra desta gran autora da nosa literatura.

Foi unha experiencia moi entretida na que, ademais de traballar en equipo, descubriron curiosidades sobre Rosalía dun xeito lúdico e diferente.

Día de Rosalía

O alumnado de 5º nivel realizou un obradoiro para celebrar o Día de Rosalía de Castro.

Compartimos unha imaxe e un vídeo deste momento no que a poesía e a lingua galega foron protagoniastas.

ENTROIDO

No noso colexio o entroido vívese con moito entusiasmo e desfrutamos de semanas cheas de actividades: ordes do meco, disfraces elaborados nas aulas, desfile polas rúas de Salceda, chocolatada que acompañamos con doces elaborados polas familias e moito baile na discoteca; por un día o ximnasio convértese nunha pista de baile.Ademais na biblioteca pintaron debuxos e caretas. 

A continuación podedes ver un vídeo sobre o noso entroido. 

14 de febreiro e taller de papiroflexia

O 14 de febreiro a biblioteca do colexio acolleu un divertido taller de papiroflexia no que o alumnado deixou volar a súa creatividade. Con papel e paciencia, crearon preciosos corazóns.

Na imaxe pódense ver algunhas das creacións realizadas.

Día Internacional da muller e a Nena na Ciencia

Para traballar este día, as voluntarias de quinto fixeron un mural, exposición de libros e biografía de mulleres científicas.

Teatro na nosa biblioteca

As voluntarias de 5º fixéronnos desfrutar dunha obra teatral titulada Mabel, Mabul y Mabuli, adaptación do conto "Mabel y la montaña" de Kim Hillyord.

Equipo de Biblioteca

Día da PAZ

Celebramos o día da PAZ no noso colexio e na nosa biblioteca. É un día moi importante para lembrar que debemos tratarnos con respecto, amizade e cariño.

Aquí podedes ver un pequeno vídeo das actividades que fixemos. Equipo de Biblioteca

Papiroflexia na biblioteca

A biblioteca acolleu unha clase de papiroflexia na que o alumnado desfrutou creando diferentes figuras a partir de papel. Unha actividade creativa que fomentou a concentración, a paciencia e a imaxinación.

Equipo de Biblioteca

Txano e Óscar: unha lectura compartida en 6ªA

Durante o primeiro trimestre do curso, o alumnado  de 6ºA leu o libro de Txano e Óscar, unha lectura que nos acompañou durante as nosas horas de ler e que deu pé a reflexións, diálogos e actividades creativas arredor da historia e das súas personaxes.

Tras rematar o libro, o grupo realizou un mural colectivo no que aparecen os retratos das personaxes principais, elaborados polo propio alumnado, xunto cunha recomendación lectora.

Este mural foi colocado nun dos corredores do centro, converténdose nun pequeno escaparate lector  que chama a atención de quen pasa por alí e contribúe a dar visibilidade ao traballo realizado na aula, así como a fomentar o gusto pola lectura entre todo o alumnado. 

Desde a biblioteca escolar queremos felicitar á clase de 6ºA polo seu esforzo e creatividade.